Go'sht sifatini pichoq emas, harorat hal qiladi

Mijoz do'konda go'shtni ko'radi va uning sifatini rangi bo'yicha baholaydi. Aslida sifat undan bir necha kun oldin — sovutish kamerasida hal bo'lgan.

Birinchi 24 soat

So'yishdan keyin tana 24 soat ichida 0…+4 °C ga tushishi kerak. Sekin sovutishda bakteriyalar ko'payadi va mahsulotning yaroqlilik muddati qisqaradi — buni keyin hech qanday qadoqlash tuzatolmaydi.

Muz kristallari masalasi

Sekin muzlatishda katta muz kristallari hosil bo'ladi va ular hujayra devorlarini yirtadi. Natijada erigandan keyin tovoqda suv qoladi, go'shtda esa shira qolmaydi.

1. −35 °C tunnel: mahsulot markazi 90 daqiqada −18 °C ga yetadi
2. Kristallar mayda bo'ladi, hujayra tuzilishi saqlanadi
3. Eritilgandan keyin og'irlik yo'qotish 2% dan kam

Eng zaif nuqta — yo’l

Zavodda hamma narsa mukammal bo'lishi mumkin, lekin yozda ochiq mashinada bir soat yurish butun ishni bekor qiladi. Shuning uchun har bir reysda harorat yozib boriladi va yetkazishda mijoz bilan birga tekshiriladi.